Looking Back Towards History of Koch Rajbanshi
अतिप्राचिन समयकार रामायण, महाभारत , तन्त्र, पुराण आदि धार्मिक ग्रन्थलात प्राग्ज्योतिष, कामरुप देशेर काथा उल्लेख पावा जाछे । निसन्देह एख्हेडा देशक प्राचिन कालत प्राग्ज्योतिष आर मध्य कालत कामरुप कहिस्ले । प्राग्ज्योतिष कहवार देश महाभारतेर युद्धर समयत बङ्गर जिल्ला जलपाइगुरि, कोचबिहार , रङ्गपूर ,मैमनसिह ,ढाका , त्रिपुरा आर पावनार भाग विशेष आर नेपाल देशेर एक भाग साथे आधुनिक आसामेर श्रीहट्ट आर बिहारार पूर्व भाग प्राग्ज्योतिष नामक देशेर भित्रत छाले ।
हिन्दु धर्मर महाकाव्य 'रामायण' अनुसार अमूर्तराज नामक राजाडाय प्राग्ज्योतिष राज्य प्रतिष्ठा करिस्ले । प्राग्ज्योतिष राज्यर राजधानी छिले 'प्राग्ज्यो तिषपुर' ( आल्हाकार गुवाहाटी नगर ) । महाभारतेर कालत प्राग्ज्योतिषेर सीमा दछिण बङ्गोप सागर आर पशचिम करोतोया लदि तक विस्तृत छिले । सैकालत करोतोया छिले एकटा विसाल लदि आर वर्तमान तिस्ता , कोशी आर महानन्दा एखे संगे मिलाल छिले । लण्डनेर इतिहासकार एडवार्ड गेइट प्राग्ज्योतिष राज्यर सिमाना वर्णन एनङ प्रकार करिचे - when the stories relating to it were inserted in the Mahabharat, is stretched southwards as far as the bay of bangal and its western boundary was Karatoya. This was then a river of the first order, and united in its bed the streams which now go to form the Tishta, the Koshi and Mahananda.प्राग्ज्योतिष राज्यर नाम ' कामरुप ' हवार एक्टा सुन्दर पौराणिक आख्याण छे- "महादेवेर ससुर दक्छ प्रजापति यग्य करिस्ले । दक्छ उडा यग्यत महादेव आर सतीक निमन्त्रणा निकोरले । पितार घरत यग्यर काथा सुनियेने सतिदेवी महादेवसे अनुमति लिय पितार घर यग्य देख्वा गेल । दक्छ सतिक देखियेने महादेवेर नाम लिये नानाफ्रकारेर शिवनिन्दार काथा कहवा धोरले । पितार मुखसे महादेवेर अपमानेर काथा सुनायेने सति आप्नार अमूल्य जीवन अग्निकुण्डत ढाप दियेने देहा त्याग कोरले । सतिर मृत्युर काथा सुनियेने महादेव दक्छर घरत आस्ले आर सतिर मृत्यु देहा उठाए काङ्घत लिये देश- विदेश वेरवा धोरले । महादेवेर एनङ अद्भूत अवस्था देखियेने विष्णु सुदर्शन चक्रदे सतिर देहा लोप होले । तव महादेव तपस्यात वोठले आर कामदेव महादेवेर तपस्या भङ करिस्ले । ताहाते महादेव कामदेवक भष्म करिदिस्ले । सति देविर प्राथानात कामदेव पून: आप्नार रुप पाले । जैवेलासे कामदेव आपनार रुप पाले अहिवेलासे यीड देशेर नाम कामरुप होले ।
योगिनीतन्त्रर वर्णन अनुसार - " पश्चिम करतोयासे दिक्करवासिनी तक, उत्तर दिशान्त कञ्चगिरि ( वर्तमान नेपालेर कञ्चनगिरि पर्वत ), पूर्वत तीर्थ श्रेष्ठ दिछा नदी तथा व्रहमपुत्र आर लाछा लदीर संगम स्थान तक कामरूपेर सिमा छिले । कामरूपेर पश्चिम भागेर नाम पाछुत कामातापुर होले । Dr. Francis Buchanan - Hamilton अनुसार कामातापुरत खेन उपाधिधारी ' राजवंशी' ला सासन चलाईसले। कामातापुरेर खेन उपाधिवाला राजवंशी राजा निलाम्वरेर पतनेर वाद कामातापुरत राज्य निठिले । कामातापुरत राजा नि रहवार कारणत भूइयाला शासन चलाइस्ले । भूइया शब्दर अर्थ माटी या भूइर मालिक ।
युगेर मुखत आसिए आपनार परिचय दिबार अति जरूरी छे । आपनार भाषा, संस्कृति आर इतिहास मानव सभ्यतार मापदण्ड मात्र नि हए, आप्नार अस्तित्व र केन्द्रिय धुरि हए । कोए भि जातिर जिवन स्तर उठवारताने उडा जातिर अन्तर आत्मात रहवार आत्मबल उच्च, धैर्यता,अटूट , संकल्प दृढ, लगनशिलता, नैतिकता उच्च तथा स्वालम्वी आर कर्तव्यनिष्ठ भावना रहवार अति आवस्यक छे । यिला गटेलार भावना मानव अन्तर आत्मात पैदा करूवार उपाय आप्नार भाषा , संस्कृति आर इतिहास प्रमुख खारक रूपत रहचे ।
